No More Narrow Path

Ade bocah namanye Adi. Umurnye kire2, sepuluh taonan gitu dah. Anak klas empat esde pan kire2 segituan umurnye! Rume si Adi ame sekolenye kaga jauh2. Kalo pagi nih, tiap die berangkat, die cume jalan kaki. Kaga ngongkos! Mo berangkat, mo balik lagi kerume, ye jalan aje. Jalan nyang die liwatin saban harinye juga same aje. Ntu2 mulu! Dari rumenye, die tinggal lurus, trus belok kiri, trus kanan, trus lurus lagi. Kaga ade istilah kate ‘telat’! Kalo kate orang bule, ‘on time’!

Alesan die mangkenye kaga pernah lewat jalan nyang laen, soalnye dari dulunye emang die lewat situ mulu. Tuh anak demen bener ame nyang namenye liwat situ! Soalnye, selaen karna alesan nyang tadi, die ngerasa tuh jalan emang nyaman bener buat die. Kaga ade bocah edan nyang hobinye malakin anak orang, kaga juga ade nyang namenye anjing rese, nyang kite kaga ngape2, tau2 ngejar. Pokonye nyamaaaan bener! Pokonye kaga ade nyang ganggu.

Tapi suatu hari, dijalan nyang biase die liwatin ntu, ade rume nyang kalo kate orang gedongan, di ape’in tuh… ee..,renopasi! Dibenerin gitu! Didandanin biar cakep! Segale debu pade betebaran. Belonan puing2. Pokonye berantakan bener dah! Trus kayu2 nyang ade pakunye. Mane pade bekarat. Nah, kalo paku bekarat pan, kalo nuncep bahaye!
Tapi tu anak, tetep aje liwat situ. Soalnye die pikir tu jalan emangnye ude jalannye die saban hari. Biar kate ujan badai (cieee..basenye!), tetep aje die liwatin ntu jalan. Padahal ude berape temen nyang ngasih tau jangan liwat situ. Trus untuk sementare, liwat aje jalan nyang laen. Tapi kaga! Die ogah bener dengerinnye. Ni jalan, emang ude kudunye die liwatin. Gitu nyang die pikir.
Akhirnye sih tuh rume nyang tadi direnopasi kelar juga. Tapi ntu jalan nyang emang tadinye ude sempit, jadi lebih sempit lagi. Dikit. Belon lagi cet rume nyang dipake ame nyang punye rume nyang nempel gitu ame baju. Nah berhubung baju seragam si Adi putih, ya kaga ngaruh. Mo nempel kaye ape juga tetep aje putih2 juga! Cuman emang jadi rade kaya orang bedakan aje dikit ntu baju. Hehe..! Tapi laen urusan kalo ame celanenye. Celane anak esde pan mere. Nah kalu emang kena cet tembok nyang warnenye putih, ye belang-bentong urusannye! Ya ude, saban abis liwat situ, die pasti tepok2 pantat deh! Bukannye genit, ye! Dari pade die malu, ntu celane warnenye beda ame temen2 sekolenye!

Kalu orang mikir mah, pastinya kaga gini2 amat! Mase iye sih, ntu jalan ude kaye gitu masih aje diliwatin! Padahal jalan nyang laen ade.

Tapi ini ni nyang jadi hal nyang kadang kejadian ame kite. Kalo kite kebiase ame satu hal nyang ntu2 mulu, kite gitu2 mulu. Nah contohnye si Adi ntu. Ude suse, masih aje liwat situ. Die pikir, kalo ude disitu, ye disitu mulu.

Bagusan mah kalo emang kita kudunye berube, ya berube. Jangan kita kepatok aje ame nyang ntu2 mulu. Misalnye lagi contohnye kalo kite demen ame orang. Ntu orang kudunye kaye nyang kite demen tempo hari. Ame dedemenan kite nyang dulu. Pacar gitu! Tapi nyang duluuu. Nyang jamannye masih baru-baru pacaran dulu. Jamannye kude gigit rempeyek. Sekarang pan jamannye kude gigit d’crepes (hiyy.. garing ya?). Sementare dedemenan kite nyang sekarang beda bener! Dari gayenye, carenye dia cinte ame kite, carenye die ngeladenin kite. Semue beda. Nah akhirnye kite banding-bandingin dah! Pas rasenye ude mentok ame nyang beda-beda gitu, kite malah jadi puyeng. Jadi ‘bete’ kalo kate bocah jaman sekarang. Kitenye kepengenan punye dedemenan nyang same ame dedemenan kite nyang dulu.

Ato misalnye lagi, kalo kite gawe. Kudunye kite gawe nyang begini, begini, begini. Emang dari awalnye sih kite bise terime-terime aje kalo kenyataannye gaji kite kecilan, misalnye. Tapi nyang biase kite lakuin dikantor lame, nyang begitu-begitu, eh kite banding-bandingin ame nyang dikantor sekarang. Pas rasenye kaga nyambung ame nyang kite pikir, ya ude kitenye jadi bete!

Ato mungkin juga contohnye lagi, betemen. Temen kite dari dulu nyang modelnye ntu-ntu aje. Nah, pas ade nyang beda dikit, kite kaget! Mending kalu bisa nerime-nerime aje, nah kalu buntut-buntutnye kite malah jadi rese ame die karna kaga same ame kite? Belon lagi, kite malah nganggep die aneh.. ya elah.. kite ude bikin orang laen bete, kitenye pikirannye mampet, kaga bise liat nyang beda dikit. Emangnye orang kudu same-same aje?

Pole pikir kite kudunye emang kudu ngikutin jaman ame ngikutin keadaan. Kaga bise kite tetep nyang begitu2 aje. Kite kaga bole kepatok ame nyang dulu-dulu. Hidup ini dinamis coy! (iih..gariiiing!) Kaga nyang gitu-gitu mulu. Pasti berube-berube. Walo kadang, kite juga kudu maksain dikit untuk itu. Emang maksain untuk bise itu tokcer bener khasiatnye. Kite emang bise berhasil dalem banyak hal juga dari maksa. Hehe.. nyadar kaga lu?

So, we should always be ready for the changes in life. And don’t ever let urself, stuck in the same kind of thought when it has anything to do with what u used to have. Hehe… base englis gue gimane? Maapin dah, kalo ade sale-sale kate.

Intinye, jangan mau kite dibates-batesin ame pole pikir kita ndiri. Kalo nyang kite pikir kaya gitu, berarti kudunye harus gitu-gitu mulu. Coba deh kite pikirin hal yang jauh lebih meluas. Kaga ade salenye. Malahan bagus!

Percaye deh, nyang namenye berube kaga selalu jelek. Kite juga ga usah bener-bener ninggalin nyang selame ini kite punye. Kite bole punye apa nyang kita pikir ideal buat kite, tapi kudunye kite pleksibel. Kesono-sini bise. Mau tetep idealis, bole-bole aje! Asal ya ntu tadi, pleksibel! Gitulah pokonye! Hehe,..pinteran dikit!

Ya ude, balik lagi ame si Adi tadi, sekarang ntu anak ude berube. Die kaga liwat ntu jalan lagi. Abisnye tu jalan akhirnye ditutup ame nyang rumenye tadi direnopasi. Katanye, kalo malem disitu suka dijadiin tempat mesum. Hiiyy.. bikin dose disamping rume orang. Dijalanan sempit lagi!

Akhirnye si Adi mau kaga mau kudu liwat jalan nyang laen. Emang ude saatnye die berube. Awalnye sih, die rada kaget dah tuh. Tapi lame2 bise terime juga. Emaknye bilang, ntu anak kudunye rada dipaksain dikit biar bise. Ya, emang bener juga tuh emaknye si Adi. Rada dipaksain dikit kaga nape. Pastinye emang entarannye bise. Emang kite kadang kudu maksain diri supaye bise. Hehe, kaye nyang gue bilang tadi. Rada dipakse biar bise.

Hmm, gitulah. Gue mau ngupi2 dulu. Emaknye si Adi pan punye warung kupi.
“Mpo! Kupinye atu! Ame ruti! Pisang goreng mah saya ude bosen! Ruti, ‘po! Rutiii…”

Walau bukan orang Betawi, bahasa Betawi gue bagus kan? hehe..
Special thanks to Om Jeje & Unee :)